Исланд би можел да ги заврши преговорите за пристапување со ЕУ во рок од „година и пол“ и да стане нејзина 28-ма земја-членка, изјави министерката за надворешни работи, Торгердур Катрин Гунарсдотир, за Политико
Исланд ќе одржи референдум на 29 август за тоа дали да ги продолжи прекинатите преговори за пристапување кон ЕУ. Неодамнешната анкета на Галуп покажа тесен резултат, при што 52 проценти од луѓето се за овој потег и 48 против.
Исланд е членка на Европската економска зона и дел од Шенген зоната за слободно патување, па затоа веќе има многу од законите на ЕУ во своите акти. Како резултат на тоа, „нема да биде толку комплицирано за нас“ и „ќе биде прилично брз процес“ за завршување на преговорите за приклучување кон блокот, под претпоставка дека Исланѓаните ќе гласаат за повторно започнување на преговорите, рече Торгердур.
На прашањето дали Исланд може да ги победи кандидатите кои се најнапредни во преговорите за членство во ЕУ, како што е Црна Гора, за да стане 28-ма членка на ЕУ, Торгердур рече „да“.
Исланд аплицираше за членство во ЕУ во 2009 година во услови на финансиска криза, но ги замрзна разговорите во 2013 година по спор околу политиката за рибарство и промена на економските околности; формално ја повлече својата апликација во 2015 година.
Пред тоа, Рејкјавик затвори 11 од 33-те преговарачки поглавја – пресвртница што Црна Гора ја надмина само во последните неколку месеци. Службеник на ЕУ, на кого му беше дозволено да остане анонимен за да зборува слободно, минатиот месец изјави за Политико дека може да потрае само една година за да се завршат преговорите со Рејкјавик.
Торгердур предупреди дека дури и ако Исланѓаните се изјаснат „да“ во август, сепак ќе треба да се одржи уште едно гласање откако ќе завршат преговорите.
Исланд аплицираше за членство во ЕУ во 2009 година во услови на финансиска криза, но ги замрзна разговорите во 2013 година по спор околу политиката за риболов и промена во економските околности.
Но, придобивките од приклучувањето кон блокот во време на „геополитички турбуленции“ оставаат впечаток, рече Торгердур. „Исто така е многу важно за нашите бизниси, за нашите индустрии да им дадеме засолниште и да ги заштитиме во рамките на Унијата.“
Исланд би имал корист од приклучувањето кон ЕУ и економски и од безбедносен аспект, рече Торгердур. „Секогаш имаме повисока инфлација и каматни стапки од другите европски земји. И има премногу монополи во економијата.
“ ЕУ, исто така, би имала корист од тоа што геостратешкиот и богат Исланд би бил дел од блокот, додаде таа.
Со референдумот во август, „му ја даваме моќта на народот“, рече Торгердур. „Би рекла дека би било корисно и за Исланд и за Европската Унија да преговараат сега, не за две години или што и да е, туку сега“.