ДУИ остро реагираше на изјавата на премиерот дадена во Собранието во врска со употребата на албанскиот јазик, оценувајќи ја како еден од најзагрижувачките моменти во политичкиот дискурс од потпишувањето на Охридскиот мировен договор.
Во своето соопштение, партијата нагласува дека ставот дека албанскиот јазик може да се користи „колку сакате“, но дека службен јазик е македонскиот, претставува сериозно отстапување од уставниот поредок.
„Тврдењето дека албанскиот јазик може да се користи ‘колку сакате’, но дека службен јазик е македонскиот, не е само политичка изјава, тоа е директно враќање на логиката на Уставот од 1991 година и тогашниот член 7, игнорирајќи го Амандманот V од 2001 година, кој претставува темел на уставниот поредок и на меѓуетничката рамнотежа во државата“, се наведува во реакцијата на ДУИ.
Од партијата оценуваат дека таквиот пристап ја нарушува суштината на Охридскиот договор.
„Овој став ја нарушува суштината на Охридскиот договор, кој не е симболичен компромис, туку реална архитектура на соживот, изградена токму за да ги надмине изворите на конфликт што ги создаде Уставот од 1991 година“, стои во соопштението.
ДУИ предупредува дека релативизирањето на статусот на албанскиот јазик отвора сериозни ризици за меѓуетничките односи.
„Релативизирањето на статусот на албанскиот јазик не е прашање на толкување, туку отворање на опасен пат што директно ги засега меѓуетничките односи и функционалноста на нашата мултиетничка демократија“, велат од партијата.
Во реакцијата се додава дека ваквиот пристап претставува обид за ревизија на постигнатите резултати и чекор назад.
„Овој пристап претставува чекор назад и обид за ревизија на темелните достигнувања на државата, инспириран од логики што се во спротивност со концептот на мултиетничка и демократска држава“, се наведува во соопштението.
На крајот, од ДУИ го повикаа премиерот веднаш да се повлече од оваа позиција и целосно да го почитува уставниот поредок произлезен од Охридскиот договор.
„Го повикуваме Премиерот веднаш да се повлече од оваа позиција и целосно да го почитува уставниот поредок произлезен од Охридскиот договор. Секое отстапување од овој поредок не е само политичка грешка, тоа е удар врз самите темели на соживотот и функционалноста на државата“, се заклучува во реакцијата.