Семејна расправија во гостиварската населба Дутлок завршила со трагично убиство. 33-годишен маж е осомничен дека со умисла го лишил од живот својот татко, а потоа се обидел да ги прикрие трагите од злосторството.
Од Основното јавно обвинителство во Гостивар информираат дека е донесена Наредба за спроведување истражна постапка против осомничениот за кривично дело „убиство“ по член 123 став 2 точка 2 од Кривичниот законик.
Според првичните сознанија, настанот се случил во семеен дом, каде по претходни недоразбирања избила жестока расправија меѓу таткото и синот.
Осомничениот го нападнал таткото, удирајќи го со раце и тврди метални предмети, при што му нанесол тешки телесни повреди од кои 63-годишниот маж починал на местото.
По извршеното убиство, осомничениот се обидел да ги прикрие трагите од делото.
Тој го измил телото на починатиот и го подготвувал за погреб, со цел да го сокрие злосторството.
Случајот бил откриен по пријава од анонимен граѓанин, кој се јавил од странски телефонски број.
Полициските службеници веднаш излегле на местото на настанот, а увид извршил и јавен обвинител, кој наредил обдукција на телото.
Јавниот обвинител до судијата на претходна постапка при Основниот суд во Гостивар доставил предлог за определување мерка притвор за осомничениот, поради постоење ризик од бегство, како и опасност дека може да влијае врз сведоците и да ги прикрива или уништува траги од делото.