„Прошетката со албанскиот претседател Бајрам Бегај и неговата сопруга Арманда низ охридските сокаци и разгледувањето на древните вредности, коишто воодушевуваат со автентичноста и убавината, беше вистинско патување низ времето и богатата ризница на нашето исклучително и колоритно наследство. Преку културниот дијалог ги зацврстуваме мостовите на зближување, довербата, пријателството, меѓусебното разбирање и соработка.“ – објави претседателката на Република Македонија Гордана Силјановска-Давкова на својот официјален фејсбук-профил по денешната работна средба и разговорот со претседателот на Албанија Бајрам Бегај во Охрид.
Во својата објава на општествената мрежа македонската претседателка Силјановска-Давкова дополни: Посетивме неколку единствени обележја, почнувајќи од Чинарот, продолжувајќи со Алипашината џамија, потоа споменикот на Св. Климент, куќата на Робевци, музејот на хартијата и црквата ,,Св. Софија” – секој од нив траен симбол на духовноста, уметноста, традицијата и историјата.