Трендот укажува на постепено намалување на секторот, особено во делови кои традиционално носат најголем товар на економијата.
Според податоците на Државниот завод за статистика, бројот на работниците во индустријата во февруари 2026 година е намален за 3,4 проценти во споредба со истиот месец минатата година.
Пад е забележан во сите клучни сектори. Во рударството и вадењето камен бројот на вработени е намален за 6,3 проценти, во преработувачката индустрија за 3,4 проценти, додека во секторот снабдување со електрична енергија, гас, пареа и климатизација намалувањето е 0,4 проценти.
Анализирано според главните индустриски групи, намалување на бројот на работници има кај енергијата за 2,4 проценти, кај капиталните производи за 4,5 проценти, кај нетрајните производи за широка потрошувачка за 4,1 процент и кај интермедијарните производи, освен енергија, за 3,0 проценти.
Единствен раст е регистриран во сегментот на трајни производи за широка потрошувачка, каде бројот на вработени е зголемен за 1,6 проценти.
Овие бројки укажуваат дека индустријата се соочува со предизвици кои се рефлектираат не само врз производството, туку и врз вработеноста, при што најголем притисок трпат секторите поврзани со енергијата и капиталните инвестиции.