Зоолошката градина „Скопје“ годинава слави еден век од своето основање и од денеска почнаа активностите за одбележување на големиот јубилеј, па за најмалите посетители беше организирана едукативна и музичка програма исполнета со забава, учење и дружење.
„Со поддршка од врвни експерти и нова енергија, како Марјо Худемакер, кого ја имаме честа денеска да е со нас, правиме чекори кон враќање на Европската асоцијација на зоолошки градини и аквариуми и поставување повисоки стандарди за животните, за едукацијата и за довербата. Следуваат инвестиции, модернизација и нови содржини, со цел Градината да биде место кадешто се учи, се доживува и се гради свест. Ги започнуваме и кампањите за поддршка, вклучувајќи грижа за животни, кадешто секој може да даде свој придонес и да се грижи за одредено животно“, изјави скопскиот градоначалник Орце Ѓорѓиевски.
Зоолошката градина во Скопје e формирана во 1926 година од тричлена комисија со која раководел д-р Станко Караман, од која е предложена нејзината денешна локација, која во тоа време опфаќала површина од 4 хектари, а градината располагала со скромен број животни претежно добиени како подарок.
Со решение на Градското собрание во 1965 година и со донесувањето на елаборатот следната година за ново урбанистичко решение, Зоолошката градина Скопје го добива денешниот изглед. Денес таа е сместена на површина од 12 ха и располага со 503 животни, од кои: 261 птица од 36 вида, 230 цицачи од 42 вида и 16 влекачи од 8 вида.