Бизнис

Стопанството предупредува: „Кризите носат смрт за бизнисот“

Состојбата во стопанството засега е стабилна, нема физички недостиг на нафтени деривати. Но, ако високите цени се задржат подолг период, ризикот е тие да се прелеат во поголеми трошоци за стопанството, инфлациски притисоци, послаба ликвидност и поголема неизвесност во инвестициите – изјави претседателот на Стопанската комора на Македонија, Бранко Азески. Според него, неизвесноста од кризата предизвикана од конфликтот на Блискиот исток е голема и потребен е навремен, предвидлив и координиран пристап меѓу институциите и бизнисот.

Состојбата во стопанството засега е стабилна, нема физички недостиг на нафтени деривати, но, ако високите цени се задржат подолг период, ризикот е тие да се прелеат во поголеми трошоци за стопанството, инфлациски притисоци, послаба ликвидност и поголема неизвесност во инвестициите. Ова го посочи претседателот на Стопанската комора на Македонија, Бранко Азески во телевизиско госутување на емисијата „Бизнис 21“.

Според него неизвесноста од кризата предизвикана од конфликтот на Блискиот исток е голема и потребен е навремен, предвидлив и координиран пристап меѓу институциите и бизнисот.

  • Последиците за компаниите ќе бидат големи и сериозни ако влеземе во втората фаза каде што ќе треба да се преземат мерки коишто се нормално непопуларни и ќе доведат до нови задолжувања на државата. А да не зборувам за третата фаза во којашто неконтролирано би се појавиле повеќе жаришта воени во светот. Во тој случај мислам дека ние како мала земја, шансите нешто да направиме, ние би биле тогаш едноставно колатерална штета – изјави Бранко Азески, претседател на СКСМ.

Азески е уверен дека Владата на време ќе преземе мерки. Вели три недели пред да почне кризата знаеле што ќе се случува и се договориле со Владата дека државата со свои механизми ќе го штити бизнисот. Иако сетот на мерки е познат, вели рано е тој да биде обелоденет пред јавноста.

  • Барањата не можат да се истакнуваат уште сега, затоа што ќе бидат предмет на анализи на тие шпекуланти, манипуланти, што сакаат да ја искористат кризата. И тие се носат нормално во една постапка што е предвидена за нив. Главно се однесуваат на тоа да се поддржат извозните компании, да се поддржат таргетирано определени сектори коишто се најпогодени од кризата и населението коешто ќе биде сигурно да речам во таква ситуација, доведено на работ на социјалната егзистенција – изјави Азески.

Гледам злоба насекаде, вели Азески, која не обвинува дека сакаме да има повисока инфлација за да го зголемиме извозот и со тоа да направиме услуга на некого. Но тврди дека инфлацијата ја гледа како најголем непријател на бизнисот, затоа што ја руши предвидливоста. Тој исто така посочи дека геополитичките и регионалните кризи создаваат сериозна неизвесност за стопанството, а недостигот на предвидливост е „смрт за бизнисот“.  Според Азески, во услови на постојани кризи сè потешко е компаниите да планираат и да опстанат на пазарот, поради што е неопходна сериозна анализа на ризиците со кои се соочува бизнис-заедницата.

  • Крајно време е да се направи една дебела анализа, во која ќе се утврдат вистинските загрозувања на позициите на бизнисот. Ако бизнисот ги намалува ризиците и спротивставеностите во општеството, без него не можеме да одиме напред – рече Азески.

Тој посочи дека најпогодени од актуелните состојби се секторите кои директно зависат од нафтата како основно погонско гориво.

  • Најпогодени се оние сектори каде нафтата е клучна за функционирањето на бизнисот. По кризите од 2008 и 2016 година, ковид-пандемијата и енергетската криза, компаниите на некој начин се исчеличија и научија полесно да се справуваат со проблемите – оцени претседателот на Стопанската комора.

Најнови вести од: Бизнис

Европската бизнис-асоцијација ги поврза студентите со бизнис-приказните – Глобална недела на претприемништвото

Студенти од економските факултети при УКИМ, УГД и ЈИЕУ имаа можност да разговараат со претставници на компании од различни сектори за препознавањето на потребите на пазарот, започнувањето сопствен бизнис и вештините потребни за негов развој.

(Фото): Николоски во Виена повика на регионална соработка и поврзување

Зборувајќи на панел дискусијата “Заедничка визија за долгорочна економска соработка” вицепремиерот Николоски потенцира дека е потребен заеднички пристап на земјите од регионот за претставување на глобалниот пазар.

„Со свои раце, создадено со љубов“: 17. издание на Фестивалот на младо вино на „Тиквеш“ ги обедини луѓето и винската традиција

Фестивалот е и многу повеќе од прослава на младото вино, тој е прослава на луѓето, заедништвото, љубовта и вербата во иднината. Токму тие вредности се во сржта на филозофијата на „Тиквеш“, компанија која ја надградува својата богата традиција со знаење, иновации и современи пристапи, останувајќи посветена на создавањето вина и искуства што ги поврзуваат луѓето.

To top