Бизнис

Димитриеска-Кочоска: Нема ретроактивно оданочување, даночните правила важат еднакво за сите граѓани

Таа нагласи дека не станува збор за ретроактивност, туку за законска можност во рок од пет години да се утврдат и наплатат непријавени даночни обврски

Министерката за финансии Гордана Димитриеска-Кочоска, денеска, во Собранието, изјави дека кај даночните закони нема ретроактивност и дека Управата за јавни приходи (УЈП) постапува во согласност со законските одредби, кои дозволуваат проверка на неплатени даночни обврски до пет години.

Одговарајќи на пратеничко прашање од Рина Ајдари од Европскиот фронт, која обвини дека УЈП ретроактивно поднесува даночни пријави за работници во странство, при што најпогодени биле граѓани од албанската етничка припадност од Полошкиот и од Кумановскиот Регион, Димитриеска-Кочоска ги отфрли ваквите тврдења.

Таа нагласи дека не станува збор за ретроактивност, туку за законска можност во рок од пет години да се утврдат и наплатат непријавени даночни обврски.

– Кај законите кога станува збор за даноци, нема ретроактивност. Законот дозволува пет години да се вратите, тука нема ретроактивност, туку пет години оној што нема платено данок, има обврска да го плати – појасни Димитриеска-Кочоска.

Министерката за финансии оцени дека е несоодветно даночните прашања да се поврзуваат со етничката припадност на граѓаните посочувајќи дека првите реакции за ова прашање дошле од лица од Куманово, кои работеле во Авганистан и биле од македонска етничка припадност.

– Не знам зошто и од оваа тема се трудите да направите повторно етнички тензии кога, на пример, првите граѓани или даночни обврзници што реагираа беа луѓе што работеле во Авганистан од Куманово, Македонци. Македонци беа првите што реагираа, не беа Албанци. Данокот не препознава Македонци или Албанци. Законот важи еднакво за сите. Данокот не препознава Македонци, Албанци, Турци, Срби, Власи или која било друга етничка заедница. Сите граѓани се еднакви пред даночните прописи – истакна Димитриеска-Кочоска.

Според Димитриеска-Кочоска, УЈП во изминатиот период повеќепати ја информирала јавноста за обврските на граѓаните што остваруваат приходи од странство и е надлежна институција за спроведување на законските процедури.

– Искрено сум изненадена од ова прашање: Дали е платен данокот или не е платен данокот? Прашањето е тоа. Управата за јавни приходи мислам дека во изминатиот период многупати одговараше во однос на ова прашање и имаше известувања до граѓаните. Тоа што некогаш не се презеле контроли, а сега се преземаат, тоа е одлука, најверојатно, на луѓето што работеле и во регионалните дирекции – изјави Димитриеска-Кочоска.

Според Димитриеска-Кочоска, евентуалното непреземање контроли во минатото не ја поништува законската обврска за плаќање на данокот и нагласи дека институциите имаат право во законски предвидениот рок да побараат наплата на непријавените обврски.

– Во рокот од пет години има обврска тоа да го констатира Управата за јавни приходи и да го побара да се плати. Еве, не ни се вратиле 10 години, не ни се вратиле 6-7 години, пет години. Иако верувам дека ако се врателе и 6-7 години, ќе имало ситуации да не се платени даноците, но не се вратиле затоа што законот дозволува да се вратите само пет години – рече Димитриеска-Кочоска.

Димитриеска-Кочоска нагласи дека сите граѓани сме еднакви во оваа држава, а особено кога станува збор за даноците.

– И, ве молам, кога станува збор за даночни обврски, немојте да мешате етнички припадности. Сите граѓани сме еднакви во оваа држава од многу аспекти, а па за данокот особено – изјави Димитриеска-Кочоска.

Најнови вести од: Бизнис

(Фото): Николоски во Виена повика на регионална соработка и поврзување

Зборувајќи на панел дискусијата “Заедничка визија за долгорочна економска соработка” вицепремиерот Николоски потенцира дека е потребен заеднички пристап на земјите од регионот за претставување на глобалниот пазар.

„Со свои раце, создадено со љубов“: 17. издание на Фестивалот на младо вино на „Тиквеш“ ги обедини луѓето и винската традиција

Фестивалот е и многу повеќе од прослава на младото вино, тој е прослава на луѓето, заедништвото, љубовта и вербата во иднината. Токму тие вредности се во сржта на филозофијата на „Тиквеш“, компанија која ја надградува својата богата традиција со знаење, иновации и современи пристапи, останувајќи посветена на создавањето вина и искуства што ги поврзуваат луѓето.

ЕВН вработува инженери, огласот е отворен до 23 ноември

Заинтересираните кандидати треба да имаат завршено средно електротехничко образование – IV степен, насока енергетика. Дополнителни квалификации за работа под напон, положен стручен испит за ракување со енергетски уреди и постројки, како и познавање компјутерски вештини ќе се сметаат за предност.

В среда продолжува Комисиската расправа за Предлог-буџетот за 2027 година

За капитални расходи се планирани 40,8 милијарди денари. Даночните приходи се проектирани на 223,1 милијарди денари, што претставува раст од 6,4 проценти. За социјални трансфери се предвидени 220,8 милијарди денари, што е зголемување за 4,1 проценти, од кои 123,8 милијарди денари за исплата на пензии или раст за 4,8 проценти во согласност со законското усогласување.

АЕТМ: Половина од онлајн купувачите во Македонија плаќаат исклучиво во готовина при достава

Новата Анализа на плаќањето при достава и дигиталните плаќања во е-трговијата во Македонија за 2026, спроведена од Асоцијацијата за е-трговија на Македонија со поддршка на Visa и презентирана на деветтата Регионална конференција за е-трговија во Скопје, открива значителен јаз меѓу пристапот до платежни инструменти и нивната реална употреба.

Првата аукција на 30 ноември – Народна банка презема чекори за обезбедување нов сопственик на „АЛТА банка“

Постапката е дел од активностите насочени кон обезбедување нов сопственик на Банката, создавање услови за нејзино натамошно работење и зачувување на интересите на штедачите и останатите клиенти.

MTEL им подарува SkyShowtime на корисниците – повеќе филмови, серии и забава

Од 16 ноември, корисниците што ќе склучат договор за mSAT, MOVE, mBOX или mCONNECT ќе добијат ваучер за пристап до SkyShowtime Standard пакетот без дополнителен надомест во текот на промотивниот период. Така ќе можат да уживаат во широк избор меѓународни филмови и ТВ содржини.

To top