Основното јавно обвинителство Скопје побара 48-часовен притвор за 19-годишниот жител на Бојане пријавен од неговиот татко за убиство на една година помлад соселанец.
Истовремено, продолжува постапката за прибирање докази, а издадена е и наредба за обдукција на телото на починатиот.
„На 17.05.2026 година во 00:50 часот во селото Бојане, полициски службеници од СВР Скопје го лишиле од слобода М.Б. (19) од Бојане, поради основано сомнение дека сторил кривично дело ‘убиство’ по член 123 од Кривичниот законик. Претходно, на бројот 192 се јавил неговиот татко И.Б., кој пријавил дека М.Б. му признал оти на 15.05.2026 година во шума во близина на Сарај, со огнено оружје го убил Б.Д. (18) од Бојане. Полициските службеници го привеле осомничениот, а биле пронајдени и телото на жртвата и оружјето со кое се сомнева дека е извршено убиството“, изјави портпаролот на МВР, Гоце Андреевски.