ВМРО-ДПМНЕ остро и недвосмислено го осудува насилството врз младата девојка во Охрид со порака дека никој не е над законот и сите институции мора да постапат во согласност со законите.
„ВМРО-ДПМНЕ застанува зад Сара и нејзиното семејство, сочувствува со нив и повикува на итна и решителна реакција во заштита на правната држава и жртвите на насилство.
За насилството нема и нема да има место во Македонија. Затоа ги повикуваме институциите, во согласност со законите, да ги преземат сите мерки и активности за целосно расчистување на случајот, со цел сторителот да биде изведен пред лицето на правдата.
Никој не е над законот и за конкретниот случај мора да има детална истрага и одговорност“, соопштија од партијата.
Оттаму велат дека доколку институциите, секоја во рамките на своите надлежности, не постапат и не реагираат во согласност со законите, сите одговорни ќе бидат повикани на одговорност.
„Откако МВР постапило и го обезбедило осомничениот за насилството, надлежниот јавен обвинител го пуштил на слобода, со благи мерки на претпазливост и тактизира. Ова е скандалозно однесување на Обвинителството, за која мора да има одговорност.
Доколку постојат индиции дека кој било, дури и од Обвинителството, се обидува да го заташка случајот или на незаконски начин да влијае врз постапката, мора веднаш да биде изведен пред лицето на правдата“ порачуваат од ВМРО-ДПМНЕ.
Додаваат дка институциите не смеат да имаат милост кон насилниците, дека Државата мора да реагира јасно, недвосмислено и во согласност со законите и дека ниту еден случај на насилство врз жените не смее да помине неказнето.