Во периодот од 22 до 24 јуни во Скопје се одржа меѓународната конференција „Дијалог за единство и мир 2026“, организирана од Кабинетот на поранешниот претседател на Република Македонија, д-р Ѓорге Иванов, во соработка со Меѓународниот центар Алијанса на цивилизациите и Асоцијацијата на алумнисти на Школата за млади лидери.
Конференцијата собра поранешни и актуелни државници, дипломати, претставници на меѓународни организации, универзитетски професори, истражувачи, претприемачи и млади лидери од Европа и Азија. Учесниците дебатираа за актуелните глобални предизвици, безбедноста, економската соработка, дигиталната трансформација и улогата на младите во современото општество.
На свеченото отворање, поранешниот претседател Ѓорге Иванов истакна дека во услови на растечки глобални предизвици, мирот и стабилноста можат да се обезбедат единствено преку дијалог, почитување на различностите и заедничка одговорност.
Обраќања имаа и вицепремиерот за политички систем Љупчо Димовски, амбасадорката на Народна Република Кина во земјава Џијанг Сјаојан и потпретседателот на Кинеската асоцијација за меѓународно разбирање, Лиу Хонгцаи.
Во рамките на конференцијата се одржаа повеќе панел-дискусии посветени на меѓународниот мир и безбедност, економскиот развој на Кина и соработката со земјите од Централна и Источна Европа, цивилизацискиот дијалог, дигиталната трансформација, како и на улогата на младите во услови на брзи глобални промени.
Во заклучоците од конференцијата беше нагласено дека современите глобални предизвици бараат интензивирање на меѓународната соработка, почитување на различностите и постојан дијалог меѓу државите, институциите и граѓанските организации.
Организаторите изразија благодарност до сите учесници, говорници и партнери за придонесот во успешната реализација на конференцијата, истакнувајќи дека дијалогот останува клучен инструмент за градење мир, разбирање и соработка меѓу народите.