На конститутивно-изборната седница на Собранието на Црвениот крст на Република Македонија, за претседател на организацијата за новиот четиригодишен мандат е избрана д-р Лилјана Ристевска. Со оваа одлука таа станува првата жена претседател на Црвениот крст на Република Северна Македонија од осамостојувањето на државата, соопштуваат оттаму.
Изборот на Ристевска претставува важен историски момент за најголемата хуманитарна организација во земјава, како и благодарност за нејзината долгогодишна посветеност, професионалност и активен придонес во развојот на Црвениот крст.
„Со повеќе од две децении искуство во организацијата – како волонтер, претседател на Општинската организација на Црвен крст во Битола и актуелен потпретседател на Националното здружение, Ристевска ја презема оваа задача со визија за модерен, посилен и поотворен Црвен крст, подготвен да одговори на современите хуманитарни предизвици.
Во новиот мандат фокусот ќе биде ставен на зајакнување на волонтерството и членството, развој на локалните организации, унапредување на хуманитарните услуги, транспарентно управување и зајакнување на партнерствата во земјата и во рамките на Меѓународното движење на Црвениот крст и Црвената полумесечина“, се вели во соопштението на Црвениот крст на РМВ.
Изборот на првата жена претседател од осамостојувањето на Македонија претставува важен чекор кон натамошно унапредување на еднаквите можности и лидерство во хуманитарниот сектор, а истовремено продолжување на мисијата на Црвениот крст – да им служи на луѓето со хуманост, непристрасност и солидарност.