Најмоќната воена алијанса во светот останува цврста во својата поддршка за Украина и нема да му дозволи на рускиот претседател Владимир Путин да ја оствари својата цел преку исцрпување на западната помош. Ова е главната порака што произлегува од одлуките на Самитот на НАТО во Анкара, истакна Радмила Шекеринска во ексклузивно интервју за 4tv.mk.
„Клучната порака е дека Путин не може да очекува дека ние ќе се предадеме и дека Украина ќе мора да крене раце поради тоа што нема да има поддршка. Нашата цел е со ваквите пораки да обезбедиме шанси за вистински преговори. Преговори кои ќе обезбедат долгорочен мир“, децидна е Шекеринска.
Таа нагласи дека континуираната финансиска и воена помош за Киев не е само израз на солидарност, туку и директен инструмент за притисок врз Москва.
„Тоа нема да биде како во 2014 година – крај на една епизода, а потоа почеток на уште поголема војна. Туку тие преговори ќе бидат основа за мир кој ќе го стабилизира целиот континент“, порача таа.
Шекеринска додаде дека земјите-членки на НАТО се целосно свесни дека евентуалното наградување на агресијата кон соседите би создало опасен преседан. Затоа, Алијансата останува доследна на својата основна определба – да функционира како одбранбен сојуз кој безкомпромисно ја штити безбедноста на своите членки.
Интервјуто со Радмила Шекеринска е реализирано на Самитот на НАТО во Анкара, Турција.