Полицијата ја уапси директорката на ЈП „Комуналец“ во Гостивар, Артана Асани, во координација со основното јавно обвинителство од Гостивар. Таа е изнесена со лисици на рацете од просториите на Јавното претпријатие „Комуналец“ .Според првичните информации, со неа се уапсени и двајца нејзини соработници – техничкиот директор Леон Нуредини и раководителот на водоводот Вадедин Дервиши.
Се очекува МВР да објави детали за апсењето, а со тоа да се разјасни што се случува поконкретно со водата во Гостивар. Неколку институции, кои вршеа испитувања и ги имаат резултатите сè уште не ги соопштуваат, бидејќи треба да ги достават до Јавното обвинителство. Од Основното јавно обвинителство истакнуваат дека извештаите ги добиваат денеска, а сè што ќе имаат ќе соопштат утре.