За да се растовари хаосот што настана на граничниот премин Табановце, синоќа беа ставени во функција осум посебни пунктови за наплата на сообраќајните прекршоци на странските возачи регистрирани од системот „Сејф сити“.
Според информациите на Скопје 1, целата процедура за контрола и наплата на глобата синоќа одземала околу 15 минути по поединечен возач.
Оваа мерка следуваше по големиот сообраќаен колапс кој го парализираше преминот, откако почетокот на проверките за возилата со странски таблички создаде километарски колони.
МНР на Романија ги предупреди своите граѓани за метежот на Табановце поради „Сејф сити“
Револтираните патници вчера масовно реагираа на социјалните мрежи, жалејќи се дека заглавиле во место и по неколку часа за да ја напуштат земјава.
Министерството за внатрешни работи ја информира јавноста дека е ставена во функција веб апликација со мобилен интерфејс „Безбеден град“, која во оваа фаза е наменета за странските државјани, односно за сопствениците и возачите на возила со странски регистарски таблички.Преку апликацијата странските државјани ќе можат едноставно и директно да добијат информации за сообраќајните прекршоци евидентирани со системот „Безбеден град“, да имаат увид во издадените прекршочни платни налози, како и да ги подмират глобите по електронски пат.