Јотова во својот говор ги поврза сегашните актуелните македонско бугарски односи со историските прашања, што со години се една од главните точки на спор меѓу Скопје и Софија.
Таа изнесе тврдење дека „денес за Бугарите во Македонија се зборува со многу омраза и поделби“, дополнувајќи дека „политичарите, но и општествата, треба да се спротивстават на таквиот говор“.
„Нема да се откажеме од вас и ќе ги чуваме вашите права.“ – кажа Јотова како нејзина порака за Бугарите во Македонија. Според неа, „историјата меѓу Македонија и Бугарија е заедничка и не треба да биде причина за нови поделби“. Јотова рече „што има да се дели меѓу двете земји“ и оцени дека „почитувањето на човековите права не треба да се третира како политичка декларација“.
Овие изјави на Јотова доаѓаат во период кога непрестајно се бараат промени на македонскиот устав и внесување на Бугарите во него како услов за „продолжување на европскиот пат на Македонија“. Бугарија во изминатиот период повеќепати инсистираше дека „нема да отстапи од барањето за гарантирање на правата на Бугарите во Македонија“. Македонската Влада бара дополнителни гаранции дека со можните уставни измени нема да следуваат нови услови на патот кон Европската Унија.
Јотова не најави нова конкретна политичка иницијатива кон Скопје, туку повторно ја потврди долгогодишната бугарска позиција дека „прашањето за Бугарите во Македонија ќе остане дел од политиката на Софија“. Таа истовремено испрати „порака дека историската меморија треба да се пренесува на идните генерации, но погледот мора да биде насочен и кон иднината“.