Грижата за повредените во трагедијата во Кочани не запира ниту по завршувањето на болничкото лекување.
Во рамките на соработката со израелскиот медицински центар „Шеба“ досега се направени 16 операции, соопшти министерот за здравство Сашо Клековски.
На денешната прес-конференција Клековски информираше дека хирурзите од „Шеба“ од Тел Авив, заедно со македонските медицински екипи, извршиле и 24 специјалистички прегледи.
Интервенциите главно биле насочени кон шаките и рацете, со цел да се врати нивната функција. Опфатиле отстранување и корекција на лузни, ослободување на контрактури, Z-пластика и кожни трансплантати со полна дебелина.
На прес-конференцијата присуствуваа и д-р Моти Харац, директор на Националниот центар за изгореници при „Шеба“, д-р Јасмина Ѓоргиевска Павловска, директорка на Универзитетската клиника за пластична и реконструктивна хирургија, д-р Катерина Мирчовска, директорка на Општата болница во Кочани, како и д-р Гордана Георгиева од работната група на Министерството за здравство.
„Здравствените власти се тука на долги патеки. Грижата за повредените во Кочани не заврши со болничкото лекување. Таа продолжува со операции, контроли и рехабилитација“, изјави Клековски, изразувајќи благодарност до израелските лекари за укажаната поддршка.