Европа ја започнува новата грејна сезона со капацитети за складирање на гас полни со повеќе од 82 проценти, што е повеќе од очекуваното и во моментов ги смирува пазарите, но аналитичарите предупредуваат дека вистинската отпорност на енергетскиот систем ќе биде тестирана дури во наредните месеци, особено ако зимата е студена.
Складирањето на гас во Европската Унија покрива околу една третина од потрошувачката во текот на зимата и се клучна заштита од скокови на побарувачката. Иако цените остануваат значително пониски отколку за време на енергетската криза во 2022 година, пазарот сè уште ги следи ризиците како што се построги санкции кон Русија, прекини во снабдувањето или геополитички шокови, објавува Блумберг.
Ова лето, Европа успеа да привлече дополнителни пратки на течен природен гас благодарение на послабата побарувачка во Кина и падот на индустриската потрошувачка во регионот.
Според податоците од Гас Инфраструктура Европа, од април до септември е складиран за една третина повеќе гас отколку претходната година.
Достапните количини варираат во зависност од земјата-членка. Франција веќе надмина 90 проценти зафатеност, додека Германија заостанува, со најголем објект во Реден кој е зафатен само 29 проценти, под планираните 45 проценти.
Глобалниот вишок на течен природен гас би можел да ја ублажи ситуацијата, но ако зимата е посурова од просекот, ситуацијата ќе биде значително понапната, коментираше аналитичарот на HSBC, Саднан Али.