Владата е отворена за дијалог и ќе поддржи секаков договор, но додека власта заедно со синсикатите не седнат на иста маса, нема да има дополнително зголемување на минималната плата. До тогаш ќе важи постојната формула за пресметување. До крајот на следната недела треба да се одржи седница на Економско-социјалниот совет.
Заменик министерот за економија, Марјан Ристески, на иста линија како министерот Дурмиши, зголемувањето на минималецот ќе влијае на растот на стапката на инфлација и на економијата во државата. Економско социјалниот совет, кој после неколку месеци неактивност треба да се состане до крајот на овој месец, го посочи како местото каде што ако падне договор меѓу работодавачите и ССМ, што е малку веројатно, Владата ќе го испочитува.
- Знаеме дека синдикатите секогаш настојуваат да се зголеми минималната плата, но еден од главните приоритети на Владата е подобрување на животниот стандард. Ние остануваме на она што секогаш го кажуваме транспарентно, договор да има во рамки на Економско-социјалниот совет каде постои и трипартитен дијалог меѓу синдикатите, работодавачите и владините институции. Она што ќе го договорат работодавачите и синдикатите, Владата ќе го испочитува. Се додека не постои таков договор, ќе важи постојната формула за пресметка на минималната плата која е донесена со договор меѓу трите страни во ЕСС. Се додека не постои таков договор, има постоечка формула донесена со трипартитен договор и потпис од сите овие три страни во ЕСС и со пресметките од таа формула ќе има зголемување. Ќе каже формулата колкаво ќе биде зголемувањето во март 2026 година – изјави Ристески.
Според податоците на Сојузот на синдикати, примања под 500 евра во земјава имаат речиси 170.000 работници. Минималната плата во е 24.397 денари (речиси 400 евра) и таа според закон се усогласува еднаш годишно во март.