„Опозицијата својата улога ја гледа во постојани напади и ширење лаги, со што, се обидува да остави впечаток кај граѓаните“, вала одговори премиерот Христијан Мицкоски на низата обвинувања на опозициската СДСМ за начинот на функционирање, но и склучените набавки за јаглен и мазут во РЕК Битола. Откако од СДСМ, вчера обвинија дека деновиве во комбинатот повторно се носи јаглен од Грција и тоа преку истата фирма за која партијата ВМРО-ДПМНЕ, на чие чело е токму премиерот Мицкоски од опозиција обвинуваше дека е со сомнителен квалитет, но и оти на шести август е склучен договор во вредност од два милиони евра за набавка на мазут со Пуцко Петрол – фирма за која ВМРО-ДПМНЕ исто така реагираше дека е вмешана во незаконски дејствија и оти носи мазут со сомнителен квалитет, премиерот Мицкоски денеска рече оти тој нема конкретни сознанија во однос на тоа кои компании соработуваат со АД ЕСМ и РЕК Битола, но посочи дека цените по кои тие фирми снабдуваат, сега се пониски за околу 20 до 25 отсто споредба со времето кога со комбинатот управувале СДСМ и ДУИ.
- „Вистинското прашање е каде оделе тие 25 отсто, тоа е суштинското прашање на кое Обвинителството и МВР отпочна процес на истраги, на предистражни постапки, судски постапки, да почекаме судовите да кажат зошто тогаш за 20 до 25 отсто се купвуале истите работи кои може да се купат сега за помала цена и зошто се купувале производи кои не се употребени или во мегаломански количини кои никогаш нема да бидат употребени“, вели премиерот.
Дополнително, вели оти од управувањето на СДСМ и ДУИ, во РЕК Битола не останало ништо и оти за среќа сега има мотивирано раководство кое работи на консолидација, работа која тој ја опиша како многу тешка имајќи в предвид дека претходно имало луѓе кои само уништувале.
Вчера, од СДСМ обвинија дека состојбата во најголемиот производител на електрична енергија е алармантна, со сериозни недостатоци и партизација. Обвинија оти во комбинатот повторно се носи јаглен од Грција преку фирма која ВМРО-ДПМНЕ од опозиција ја нарекуваше сомнителна, но и дека е потпишан нов договор за набавка на мазут со Пуцко Петрол во вредност од два милиони евра. Оттаму велат дека од ВМРО-ДПМНЕ имале низа обвинувања и за оваа фирма за незаконски дејствија и правење набавки на мазут со сомнителен квалитет. Меѓудругото, обвинија и за непотизам и партиски вработувања.
- „Примени се над 300 партиски војници, меѓу кои и зет на претседателот на битолското ВМРО-ДПМНЕ, Пеце Милевски, внук на градоначалникот во заминување, Тони Коњановски, брат на претседателот на Унијата на млади сили, Мартин Ивановски. Но, работници за тековно одржување на системите нема. Недостасуваат бравари, електричари, вулканизери и други стручни профили. Прашуваме каде се распоредени новопримените работници? Дали се заштитени и скриени по канцеларии и магацини каде и без нив има превработеност“, вели опозицијата.