Близу градскиот стадион во Тетово, сточарите започнаа со продажба на добиток за курбан. Продавачите велат дека денес е првиот ден кога почнале со продажба, додека цената на една овца се движи од 180 до 250 евра, а на овенот до 400 евра. Според продавачите, бројот на стада е значително намален, што се забележува и на импровизираниот пазар каде што бројот на сточари беше многу мал.
- „Цените се како и секогаш, такви се и оваа година. Интерес речиси и да нема, како што гледате, многу е слабо, речиси никако. Еден курбан оди од 200 евра па нагоре и зависи каков е курбанот.“ велат сточарите за ТВ 21.
- „Денес е првиот ден што сме излегле тука. Продажбата е добра, а цените не се толку високи како што мислат луѓето, но понатаму ќе видиме како ќе оди пазарот. Колку се цените на курбаните? Помалите овци се од 140 до 200 евра, овните се од 200 до 300 евра, а не како што велат 400 или 500 евра, за да ги исплашат луѓето да не купуваат курбан.“
- „Цената достигнува до 400 евра за овните, или од 200 до 250 евра, зависи од стоката. Има интерес, зависи кој каков џеб има. Ќе видиме понатаму, рано е уште. Има пораст на цените од лани, бидејќи сè поскапе. Има и недостиг, затоа што не ги чуваат и се намалени, па нормално е сè да поскапи, па и овците.“
Но купувачите имаат поделени мислења. Некои велат дека не е скапо, а други сметаат дека цените се високи за оваа економска криза и за трошоците што граѓаните ги имаат секој месец.
- „Не се скапи, не се скапи, дури треба да бидат и поскапи. Кога ние не ја чуваме стоката, нека биде скапа. Нека поскапат, 500 евра, па дури и илјада нека бидат.“
- „Средни се, каква што е стоката, такви се и цените. Но какви се платите? Платите не се ништо, воопшто не се.“
- „За времето и кризата што ја имаме сега, курбаните се скапи. И тие си имаат свој мака, свесни сме дека и кај нив многу работи поскапеа. Но ние сакаме да ја одржиме нашата традиција. Трошоците се насобраа од сите страни и станаа екстремни. Условите се такви што е невозможно да се издржи до крајот на месецот.“
Сточарството во тетовскиот регион се соочува со една од најсериозните кризи во последните децении, директно погодено од бранот на иселување на младите и недостатокот на интерес за наследување на традиционалните занаети. Според самите сточари, бројот на добиток драстично се намалил, бидејќи младите генерации ги напуштаат селата, оставајќи ги само постарите да се грижат за малкуте преостанати стада.