Следната недела ќе започне реконструкцијата на аеродромот „Свети Апостол Павле“ во Охрид, прва по неговата изградба, најави вицепремиерот и министер за транспорт, Александар Николоски. Според Николовски, преземени се активности и аеродромот е легализиран, што, нагласува тој, бил тежок процес.
- „Реконструкцијата ќе биде прва од ваков вид од нејзината изградба. До неодамна, тоа беше нелегален објект, го имавме пред нас, но го немаше на хартија. Успеваме да го легализираме, што е штета за државата што еден од двата аеродроми го нема на хартија. Беше тежок процес бидејќи мора да се регистрира целата инфраструктура. Но, тоа е завршено, а потоа следува реконструкцијата што ќе донесе повеќе летови и патници и очекувам туристичкиот дел да биде насочен таму, а деловниот дел да дојде во Скопско“, изјави вицепремиерот Николоски.
Николоски, исто така, потсети дека се работи на договор за воздушен сообраќај со Саудиска Арабија и дека очекува да се воспостави директна линија меѓу двете земји. Паралелно, откако неодамна беа најавени нови летови од Скопје до италијанските острови Сицилија и Сардинија, сега Николоски очекува за брзо да има нова врска и со Саудиска Арабија. Во следните месец и половина ќе се преговара за лет од Скопје до дестинација во оваа земја. Владата од стартот на мандатот досега воведе 23 нови летови од аеродромите во Скопје и Охрид.