Ракометарите на Охрид се уверени дека утревечер од 19 часот пред своите навивачи во салата „Билјанини извори“ ќе ја анулираат минималната негатива од првиот натпревар со некогашниот европски првак Целје и же изборат историско финале во Европскиот куп на ЕХФ.
„Целје е најталентирана екипа во Европа. Пред нас е тешка задача. Се надевам на добра атмосфера во салата, дека охридската публика ќе биде како таа во Целје и е помогне. На првиот меч го запревме Целје на 27 гола, тие цела сезона даваа 35-40 голови, ако пак ги спуштиме на 26-27 голови, мислам дека ќе дадеме повеќе голови отколку таму. Пишуваме историја, свесни сме и се надевам дека ќе се пласираме во финалето“, изјави тренерот Борис Роевиќ.
Ако успее, македонскиот претставник во финалето ќе се обиде да го повтори подвигот од лани на Алкалоид против унгарска Татабања, која го елиминира босански Извиѓач, откако во денешниот реванш славеше со 37:34 и со тоа го „избриша“ поразот од 33:31 во Љубушки.