Извесното зголемување на цените на нафтените деривати поради војната на Блискиот Исток од Регулаторната комисија за енергетика (РКЕ) ќе биде пресретнато со вонредни мерки од Владата најавени за утрешната седница со почеток во 12 часот.
„Цените на светските нафтени берзи растат, што се очекува дополнително да се одрази на домашната цена на горивата. Иако на бензинските станици во земјава има убедливо најевтини горива во споредба со регионот се очекува во понеделник да има дополнителен раст на цените на дизелот и на бензините. Заради тоа, Владата утре во 12 часот ќе има седница на која ќе се донесат вонредни мерки за борба против високите цени на бензините со кои ќе се ублажи ценовниот скок“, велат од Владата.
Според последната одлука на РКЕ од минатиот понеделник, највисоките малопродажни цени се 92 денари за литар дизел; 86,5 денари за бензин Еуросупер 95 и 88,5 денари за Еуросупер 98.