Полицијата вчера привела пет лица осомничени за семејно насилство, двајца од Куманово, едно лице од Љубљана, Република Словенија, едно лице од струмичко и едно од Велес.
Како што соопшти МВР, синоќа во 21:00 часот полициски службеници од СВР Куманово го лишиле од слобода кумановецот М.С.(35) затоа што физички ги нападнал неговата 31-годишна сопруга и двете малолетни деца.
Подоцна, во 23:40 часот, полициски службеници од СВР Куманово го привеле 57-годишниот М.Д., кој физички ја нападнал својата 28-годишна ќерка.
Во Охрид, пак, во 20:40 часот на булеварот Македонски Просветители, бил лишен од слобода 48-годишен државјанин на Словенија од Љубљана, по претходна пријава дека во стан по вербална расправија физички ја нападнал неговата сопруга.
Вчера, во струмичко село, полицијата привела 36-годишен маж поради агресивно однесување кон неговата 65-годишна мајка.
Во Велес, вчера во 8:30 часот, бил лишен од слобода 23-годишен жител кој, според пријавата, физички ја нападнал својата 24-годишна сестра во семејниот дом.
Од Министерството за внатрешни работи информираат дека по целосно документирање на случаите ќе бидат поднесени соодветни пријави.