По сообраќајна незгода меѓу две возила дошло до физички напад кај местото викано „Врбица“, на патот Пршовце-Јегуновце. Како што информира МВР, на 27 септември во 13 часот во Полициското одделение Теарце, 65-годишниот А.Е. од село Шемшево пријавил нарушување на јавниот ред и мир.
Според пријавеното, околу 11:15 часот, по сообраќајката, А.Е. се обидел да спречи вербален напад врз една од учесничките во незгодата. Во тој момент, вториот учесник во сообраќајката, И.Р. од село Пршовце, го удрил А.Е. Присутни граѓани го спречиле И.Р., по што тој го напуштил местото. Од МВР информираат дека се преземаат мерки за целосно расчистување на случајот.