Апостолос Везиропулос, поранешен заменик-министер за финансии на Грција и актуелен генерален секретар на пратеничката група на Нова демократија, почина на 59-годишна возраст. Тој доживеа фатален срцев удар додека престојуваше на плажа во близина на Неос Николаос, Халкидики.
Одеднаш му се влошила здравствената состојба, по што изгубил свест. Неговото семејство веднаш повикало итна медицинска помош, а Везиропулос бил пренесен во здравствениот центар „Агиос Николаос“. За жал, и покрај напорите на лекарите, не успеале да го спасат.
Везиропулос беше пратеник од областа Иматија и од април 2025 година ја извршуваше функцијата генерален секретар на пратеничката група на Нова демократија. Претходно, од август 2023 до март 2025 година, тој беше претседател на Постојаната комисија за економски прашања во грчкиот парламент. Од јули 2019 до јуни 2023 година, Везиропулос служеше како заменик-министер за финансии, одговорен за даночната политика и управувањето со јавниот имот во владата предводена од Кирјакос Мицотакис, според информациите од грчките медиуми.
Грчкиот премиер Кирјакос Мицотакис изрази длабока тага по повод ненадејната загуба на својот колега. „Со шок ја примив веста за смртта на Апостолос Везиропулос. Тој беше посветен соработник и почитуван политичар, кој со години и служеше на својата партија, татковина и народ. Упатувам искрено сочувство до неговата сопруга и деца“, напиша Мицотакис на својот профил на платформата „Икс“.