Бугарскиот дневен весник „24 часа“ се надмина во провоцирањето на „браќата“ отаде (југо)западната граница уште во насловот на напис за тоа каде државните функционери на Македонија ќе заминат на одмор, во кој користи непостоечка придавка „северномакедонски“.
„Северномакедонските лидери не сакаат да одмораат во Бугарија во текот на летото“, е насловен текстот во кој врв е третата реченица: „Ниту еден од нив нема да се појави на родното Црноморие“, со јасна алузија дека се родени во Бугарија?!
Во остатокот од „новинарската“ творба на „24 часа“ се наведува дека премиерот Христијан Мицкоски во следните четири дена ќе одмора во Хрватска, шефот на дипломатијата Тимчо Муцунски со семејството е на неколкудневен одмор во Турција, а министерот за внатрешни работи Панче Тошковски во Црна Гора.
Министрите за образование Весна Јаневска и за здравство Азир Алиу нема да го користат годишниот одмор сега, фокусирајќи се на обврските во своите ресори.