Марко Виденовиќ, кој покрај настапите на виола во Македонската филхармонија, е популарен и како поет, преку својот профил на „Фејсбук“ на денот на неговиот роденден потсети на неговите лични контакти со легендата но и на универзалната вредност на Тоше Проески.
Целиот статус на Марко Виденовиќ за Тоше Проески:
Имав среќа и благослов да учам со него четири години во средното музичко училиште во Битола, и уште четири години на факултетот за музичка уметност во Скопје. Имав среќа и да настапам со него, и тоа на негово инсистирање, на Скопскиот фестивал во 1998 година, иако да бидам искрен не му бев соодветен избор за пратечки вокал познавајќи ги неговите вонземско гласовни способности, но неговата емпатија и скромност ме избра мене и уште двајца негови другари. Бев жив сведок на создавањето на легенда, човек кој беше предодреден од Бога да биде посебен. По завршувањето на факултетот соработувавме за првиот концерт на градскиот стадион во Скопје и концертот во Ријека каде настапи со симфониски оркестар за кој бев и во организационата екипа, но и дел од оркестарот. Кој знае што ќе беше ако сѐ уште беше тука помеѓу нас, можеби ќе отпееше песна со мој текст, но најважно ќе беше да беше здрав и жив, но ете Господ имал други планови за него, да остане вечен.
Ќе остане незаборавен и единствен,
Тодор – Тоше Проески.
На некои да им дадеш и безброј животи,
да запалат безброј огнови, бадијала ќе е,
пак светлина не ќе успеат да создадат,
вечно ќе мрачат и ќе темнеат.
А ти, ти тивко дојде,
само со еден живот во ракавот,
блесна за навек, создаде вечност
и брзо одлета.
А нам сѐ уште твојата светлина ни сјае,
не гали и топли,
и ни чиниш да живееме со надеж
до следната наша средба.
За Тоше
#зборовиМаркоВиденовиќ
#zboroviMarkoVidenovic