Крилото на Алијансата за Албанците предводено од Зијадин Села, порачува дека вратата е секогаш отворена за враќање на оние што заминале, на местото каде што го започнале своето политичко патување.
Оттаму порачувааат дека Села никогаш не дозволил чесни членови на партијата да бидат напаѓани, омаловажувани или исклучувани, ниту за време на соработката ниту по одвојувањето од другите групи.
„Не ве покануваме во вашиот дом, бидејќи ова е вашиот дом и тука припаѓате. Само сакаме да ве потсетиме дека ве чекаме, веруваме во вас и продолжуваме да бидеме убедени дека ќе се вратите таму каде што отсекогаш сте чувствувале топлина, правда, чистота, храброст и вистинска гордост“, се вели во соопштението на АА на Села, пренесува Телеграфи.
Арбен Таравари лидерот на другото крило на АА кој беше дел од коалицијата ВРЕДИ, пред неколку дена одлучи да ја напушти коалицијата и владата, бидејќи според него, граѓаните не биле задоволни од работата на албанската коалиција во Владата.
Тој рече дека моќта е во народот и дека неговата АА се враќа кај народот за да победи на локалните избори во октомври.