Осум лица, меѓу кои и шест полицајци, обвинети за корупција
Шест полициски службеници од граничната полиција и две други лица, меѓу кои и виш инспектор за странци овозможиле нелегален престој на странски државјани и покрај укажувањата на АНБ дека за нив постои безбедносен ризик.
Осум лица, меѓу кои и шест полицајци, обвинети за корупција.
Првообвинетиот се товари за кривично дело Примање награда за противзаконито влијание, заедно со уште две лица за кои постапката е прекината, влијаеле врз двајца полициски службеници со цел на турски државјанин да се стекне со дозвола за привремен престој во земјава иако бил незаконски овде. За тоа земале 900 евра. Полициски службеник од ГП Долно Блаце пак е обвинет за примање поткуп.
-Тој од турски државјанин кој подолго време незаконски престојувал во државата индиректно побарал и примил подарок – парични средства во износ од 3000 денари за да изврши службено дејствие што не би смеело да го изврши. Тројца полициски службеници и НН лице посредувале во давањето на поткупот, при што двајца полициски службеници со патната исправа на турскиот државјанин оствариле фиктивен влез во РМ, како услов за отпочнување на постапка за одобрување на привремен престој, велат од обвинителството.
На сличен начин му било овозможено на турски државјанин со незаконски престој да ја напушти земјава. Вишиот инспектор од јули лани до април годинава за седум лица незаконски им обезбедил привремен престој во земјуава.
-Постапувајќи по претходно поднесени барања за одобрување на привремен престој на седумте државјани од Бангладеш и Непал, обвинетиот не ги зел предвид негативните известувања од АНБ за постоење на безбедносен ризик и постапил спротивно на одредбите од Законот за странци носејќи решенија со кои на сите им одобрил привремен престој заради работа, објави Јавното обвинителство.
Истрагата за овој случај обвинителството ја отвори во мај и првично со неа беа опфатени 11 лица кои беа уапсени а две беа недостапни за органите на прогон. За едно лице потоа беше запрена постапката а за двајца беше отфрлена кривичната пријава. Едно од лицата кое беше во бегство беше уапсено во Србија и во моментов се наоѓа во екстрадиционен притвор а за другиот е објавена меѓународна потерница