Синоќа, големата сала „Борис Трајковски“ во Скопје стана центар на албанското единство, според партијата Вреди. Илјадници граѓани присуствуваа на собирот, а многумина останале надвор поради огромниот интерес, создавајќи атмосфера на силно заедништво.
„Срцата на Албанците чукаа толку силно што ниту една сала не можеше да ги собере. Скопје и сите Албанци беа еден глас. Вреди не ветува, Вреди работи“, истакнаа од партијата. Тие потсетија на постигнувањата: 40 милиони евра за Универзитетот „Мајка Тереза“, 25 милиони за плоштадот „Скендербег“, 80 милиони за албанските општини и стотици инфраструктурни проекти. До 2028 година планирани се дополнителни 240 милиони евра. „Вреди не е список на ветувања, туку инвентар на дела. Владееме одговорно, работиме посветено и ја одржуваме довербата на народот“, додаваат од Вреди.
Партијата истакна дека 2.300 Албанци се вработени во институциите, а 700 се унапредени, што гарантира правична застапеност. Вреди повика на масовна поддршка на изборите на 19 октомври: „Сега е време Албанците повторно да ја земат судбината во свои раце. Како што го ослободивме Тетово од угнетување во 2021 година и соборивме неправда од централната власт во 2024 година, така ќе ги ослободиме Струга, Дебар, Кичево, Гостивар, Скопје и Липково“.