Андоновски оцени дека оние кои, според него, имале политичка и институционална моќ во изминатиот период, денес се обидуваат да ја префрлат одговорноста за состојбата. „Филипче и Рената Младеновска треба веднаш да кажат зошто со години молчеле за загадената вода во Гостивар“, порача Андоновски.
Тој праша зошто не било постапено по, како што наведе, повеќе од 400 извештаи кои укажувале на проблеми со квалитетот на водата. „Наместо денес да морализираат, треба да одговорат зошто не постапиле по добиените над 400 извештаи кои укажувале загадена вода?“, рече Андоновски.
Од ВМРО-ДПМНЕ тврдат дека граѓаните на Гостивар треба да добијат одговори за тоа што се случувало во изминатите години и зошто, како што посочи Андоновски, не биле преземени соодветни институционални мерки. „Гостиварци мора да дознаат зошто биле труени со години, а СДС и Филипче не презеле никакви чекори“, изјави тој.
Андоновски воедно ја истакна интервенцијата на актуелната Влада во услови на актуелната состојба со водата, наведувајќи дека граѓаните добиле техничка вода и флаширана вода за пиење. „Владата предводена од ВМРО-ДПМНЕ интервенираше за граѓаните да добијат техничка вода и флаширана вода за пиење. Но паралелно со решавањето на актуелната состојба, мора да се расчисти и минатото“, рече Андоновски.
Тој побара надлежните институции да ги испитаат наводите и документацијата што беше презентирана во јавноста. „Затоа го повикуваме ЈО да отвори случај по допрен глас и да ги истражи документите кои ги споделивме во јавноста“, порача претседателот на ОК на ВМРО-ДПМНЕ Гостивар.