Ивајло Валчев, бугарски европратеник од партијата Има таков народ, го повика новиот технички премиер Андреј Ѓуров да внимава во однос на Македонија, посебно од аспект на извештајот за нејзиниот напредок на патот кон Европската унија, а имајќи го предвид минатогодишниот што ја вознемири Бугарија поради споменувањето современ македонски идентитет и јазик.
„За Бугарија, овој извештај нема стратешко значење. Минатата година, сепак, видовте дека два збора што се обидоа да се протнат – за современиот македонски идентитет и современиот македонски јазик – беа на прагот да го експлодираат бугарското општество, бидејќи Бугарија има јасна позиција, чест и национално достоинство, од кои не треба да се повлече. Бугарија не само што го спаси својот образ, туку излезе со крената глава од ситуацијата во која беше ставена од некои функционери“, изјави Валчев во интервју за бугарското Дарик радио.
„Оваа година работите стануваат покомплицирани околу влезот на Северна Македонија во Европската унија, бидејќи на сцената се подготвуваат за евентуален брз прием на Украина. Како дел од пакетот што има неколку точки за Украина, едно од запишаните нешта е давање брз пристап на Украина до членство во Унијата. Доколку тоа се случи, ЕУ ќе мора многу да им објаснува на земји како Албанија, Црна Гора, Северна Македонија и Србија зошто се забавени“, додаде тој.
„Северна Македонија по многу нешта не е подготвена за влез во Европската унија. Прашањето е покомплицирано таму отколку на други места, бидејќи има етничка поделба. Ова се работи што македонската страна не ги оспори откако го доби извештајот на Европската комисија минатото лето“, објасни Валчев.
Ѓуров е предлогот на потпретседателката Илијана Јотова за премиер на техничката влада за спроведување на изборите, роден во градот Гоце Делчев, некогашен Неврокоп, во Пиринска Македонија.