Не може луѓе што ги создадоа проблемите, што ја турнаа државата во поделби, неправди и хаос, денес да се претставуваат како спасители.
Ова е ставот на внукот на првиот претседател на Македонија Методија Андонов Ченто кој како осуден за тероризам за 27 Април ги коментира реакциите на обвинителката Ленче Ристовска и на премиерот Мицкоски за тоа кој може да биде иден обвинител.
Ристовска се жали на политичка елиминација а Мицкоски вели дека Ристовска нема да биде иден државен обвинител за што добива поддршка од Ченто.
,,Не може тие кога се газеше достоинството и кога се рушеше системот, сега да зборуваат за реформи и решенија.
Ако навистина сакаме напредок, мора да направиме јасна разлика меѓу тие што го создадоа проблемот и тие што имаат волја и интегритет да го решат.
Државата не се обновува со истата логика што ја довела до криза.
Потребна е нова енергија, чиста намера и храброст да се признае вистината и да се исправат неправдите.
Ова не е прашање на лична нетрпеливост. Ова е прашање на принцип.
На одговорност.
На морал.
Затоа што правдата не се гради со истите раце што ја урнаа довербата на граѓаните во правосудството.
И решението не може да дојде од оние што беа дел од проблемот.
Време е за вистинска промена.
Одлука за почит”, пишува Ченто за одлуката на премиерот Христијан Мицкоски Ристовска да не биде меѓу тие кои имаат шанса да бидат државен обвинител.