По новите обвинувања од СДСМ претседателот на Движењето ЗНАМ, Максим Димитриевски нагласи дека раководството на СДСМ повторно се обидува сопствените политички неуспеси и загубената доверба кај граѓаните да ги претстави како „проблем на другите партии“. – Раководството на таа некогаш државотворна партија, која денес е сведена на ниво на ликвидација, постојано сопствените грешки ги бара во туѓите редови. Колку тоа ЗНАМ се распаѓа, најдобро гледаат медиумите и граѓаните на трибините што ги организираме низ Македонија, каде салите се премали да ги примат сите заинтересирани граѓани – изјави Димитриевски.
Тој истакна дека СДСМ, наместо секојдневно да пласира политички лаги и измислени конструкции, треба конечно да се соочи со сопствените политики поради кои ја изгуби довербата на граѓаните, оценувајќи дека денешното раководство ја доведе партијата до состојба на политички стечај. – Тоа е друштво во стечај, координирано од Струмица, а ликвидаторот е Венко Филипче“- истакна Димитриевски.
Лидерот на ЗНАМ посочи дека најсилниот одговор на ваквите напади е сè поголемата поддршка што Движењето ЗНАМ ја добива на средбите со граѓаните низ целата држава. -Ние нема да се занимаваме со лаги и измислици. Ќе продолжиме да разговараме со граѓаните, да нудиме решенија и да работиме за европска Македонија со силни институции, национално достоинство и одговорна политика – заклучи Димитриевски.