Пратеникот и екс министер на СДСМ Љупчо Николовски кој е дел од парламентарна делегација која замина во посета на Америка објави Екс министерот Љупчо Николовски објави дека ја заокружил посетата на САД.
🇺🇸🇲🇰 Со оваа објава симболично ја заокружувам мојата работна посета на Соединетите Американски Држави, реализирана во рамки на програмата #OWP.
,,Искрена благодарност до американската Влада и до амбасадата на САД во Скопје за поканата и можноста непосредно да се запознаам со работата на американскиот Конгрес и Сенат.
Во изминатите денови остварив бројни средби со членови на Конгресот, нивни советници и директори на канцеларии, соработници на повеќе сенатори, како и со претставници на институции, организации и академската и локална заедница во Вашингтон и Портланд”, објави Николовски кој не открива кој друг бил во делегацијата од Македонија но објавува фотографија од своите колеги од Собранието.
,,На секоја средба ја истакнав важноста Македонија да остане силен, сигурен и кредибилен партнер на Соединетите Американски Држави. Воедно, ја нагласив потребата нашата држава да биде уште поактивно вклучена во американските програми за поддршка на партнерските земји, како и значењето на континуираната американска поддршка за нашата европска интеграција, особено во период кога политиката на проширување повторно добива силен импулс.
Од оваа посета си заминувам со многу нови пријателства, вредни контакти и уште поголема мотивација за понатамошно продлабочување на македонско-американското партнерство и сојузништво.
Пријателствата и партнерствата се градат со доверба, почит и постојана комуникација. Верувам дека токму ваквите средби отвораат нови можности за Северна Македонија и придонесуваат кон остварувањето на нашата стратешка цел – полноправно членство во Европската Унија, со силно македонско-американско сојузништво како еден од темелите на таа визија”, објави пратеникот..
Николовски преходно објави дека се сретнал и со првата американска градоначалничка од сомалиско потекло.
,,Работната посета на САД ја продолживме во Портланд, во сојузната држава Мејн.
На Универзитетот на Јужен Мејн имавме состаноци со повеќе организации на лобисти, со Дека Далак – првата градоначалничка со сомалиско потекло во историјата на САД, како и со Џонатан Вејн, извршен директор на Комисијата за владина етика и изборни практики.
Продолжуваме со интензивна агенда и значајни средби насочени кон размена на искуства и јакнување на американско – македонското пријателство”, објави Николовски.