Претседателот на СДСМ, Венко Филипче, изјави дека вистинското прашање кое треба да се анализира е што Владата за година и половина не испорачува резултати и дека ниту една категорија граѓани не е задоволна од досегашното работење.
– Работниците немаат зголемување на платите, пензионерите беа излажани, младите немаат никакви политики, а земјоделството доживеа дебакл со намалување на субвенциите. Тоа е вистинското прашање на кое треба да се одговори и кое треба да се анализира – рече Филипче за време на средбите со жителите од Крушевско, во рамките на кампањата за вториот круг на локалните избори.
Филипче истакна дека наскоро ќе се реализираат кадровски промени во раководството на СДСМ.
– Во однос на мојот мандат, кажав дека ја затекнав партијата така како што ја затекнав. Овој изборен циклус е добар показател како треба да се продолжи во следниот период. Најавив кадровски измени во раководството, ќе се случат многу брзо и продолжуваме со иста и поголема енергија на враќање на довербата на гласачите – изјави Филипче.
Според него, СДСМ ја зголемила поддршката на локалните избори во споредба со изборите од лани, иако излезноста била значително помала.
– На кандидатите за градоначалници имаме близу 159.000 гласови, што е повеќе од 152.000 колку што имавме лани, на значајно помала излезност. Во исто време, ВМРО-ДПМНЕ со дополнително нови коалициски партнери има 140.000 гласови помалку од лани, што е сериозен сигнал дека граѓаните се свесни дека оваа Влада не испорачува – подвлече Филипче.
Тој додаде дека медиумскиот фокус е насочен кон СДСМ, но според него, вистинскиот проблем лежи во намалениот број на гласови за опозициската партија.