Министерството за надворешни работи на Грција ја предупреди Македонија доследно да го почитува Преспанскиот договор во делот на употребата на државното име, реагирајќи на изјавите на македонскиот премиер Христијан Мицкоски дека ефективно ја вратил употребата на „Македонија“ на домашно ниво.
Грчкото МНР нагласува дека договорот од Нивици „е дел од Уставот на Северна Македонија и е целосно обврзувачки за двете страни, како на меѓународно, така и на домашно ниво“.
Министерството потсетува дека уставното име на северниот сосед е експлицитно дефинирано во член 1 од Преспанскиот договор и предупреди дека „секој обид за фалсификување или менување на содржината на Договорот никогаш нема да биде прифатен од грчката страна“.
Во реакцијата се додава и дека договорот „е дел од меѓународното право, а неговото почитување е основа на мирниот соживот на луѓето и на државите“.
„Во меѓународните договори нема фактички ситуации; нивното спроведување е униформно и универзално“, соопшти Министерството, истакнувајќи дека напредокот во билатералните односи и патот на Македонија кон ЕУ „бараат строго почитување на договорите и почитување на принципот на добрососедски односи“.