Македонија денеска загуби хроничар кој остави дела со кои идните генерации ќе знаат за многу важни настани од поновата македонска историја.
Утрово во Гостивар на 76 годишна возраст почина Киро Кипроски, новинар и публицист.
Тажната вест ја објавија членови на неговото семејство.
Во неговата над петдецениска кариера најдолго работеше во магичниот медиум локалната радиостаница Радио Гостивар.
Како дописник соработуваше со „Нова Македонија“, МИА, „Утрински весник“, Макфакс, Радио Скопје, „Екран“, Дојче Веле и повеќе неделници и ревии од поранешната Југославија.
Автор е петнаесетина монографии и книги за кои има добиено и признанија.
На читателската публика и е познат по репортажите и фотографиите од посетите на Света Гора, Кина, Египет, за особеностите на мијачкиот крај.
Кипроски беше заштитен знак на манифестацијата „Галичка свадба“ и ги следеше сите нејзини изданија.