„ОНЕ Македонија“ денеска официјално стана трет мобилен оператор во Република Македонија, откако Агенцијата за електронски комуникации (АЕК) ѝ додели лиценца за користење на 5Г-радиофреквенциски спектар во опсезите 700 MHz, 1800 MHz и 3.x GHz.
Со оваа одлука, компанијата, која е подружница на унгарската групација 4iG, го завршува долгогодишниот процес за воведување на нов играч на телекомуникацискиот пазар и го прекинува дуополот на постоечките два оператора. Процесот започна во декември 2024 година, кога „ОНЕ Македонија телекомуникации“ поднесе писмо за намери до АЕК, а кулминираше со јавен тендер во 2025 година, на кој „ОНЕ Македонија“ беше единствениот квалификуван понудувач.
Директорот на АЕК, Јетон Акику, лично ги врачи трите одобренија на:
- Пал Заранди, претседател на одборот на директори на „ОНЕ Македонија“ и директор на стратегии во групацијата 4iG,
- Бране Ѓуровиќ, извршен директор на „ОНЕ Македонија“,
- Габор Алтман, заменик-извршен директор во компанијата.
„Очекувам сериозен удел на пазарот. Со спроведениот трансперентен и структуриран процес на тендерот се испраќа јасен сигнал дека Македонија е посветена на фер конкуренција, долгорочни инвестиции и развој на доверливи дигитални инфраструктури“ – рече Заранди.
Тој најави дека компанијата ќе гради сопствена автономна мрежа, независна од конкуренцијата, со ангажирање на експерти за истражување на пазарот и оптимално позиционирање. Сепак, во почетната фаза, додека сопствената инфраструктура не биде изградена, „ОНЕ Македонија“ ќе користи национален роаминг преку мрежите на постоечките оператори. Лансирањето ќе започне првично во Скопје, а потоа ќе се прошири на целата територија на државата. Компанијата веќе склучила договор со Ериксон за изградба на мрежата и се обврза да ги почитува сите домашни закони за безбедност и доверливост на мрежата.
Игор Бојаџиев од АЕК соопшти дека „ОНЕ Македонија“ на 14 јануари уплатила еднократен надомест од 8.020.003 евра, со што ги исполнила сите услови за добивање на одобренијата.
Според условите од тендерот, новиот оператор има јасно дефинирани обврски за постепено воведување на 5Г:
- До крајот на март 2027 година – покривање со 5Г на барем еден град,
- До крајот на 2028 година – главните сообраќајни коридори,
- До крајот на 2030 година – сите градови во државата,
- До крајот на 2032 година – можност секој граѓанин да има пристап до 5Г интернет со минимална брзина од 100 Mbps.
Овој чекор се смета за значаен за развојот на дигиталната инфраструктура, зголемување на конкуренцијата и потенцијално намалување на цените на мобилните услуги во земјата.