Цели три дена по забраната на Агенцијата за храна и ветеринарство за пиење на гостиварската вода и илјадници заболени од тоа, Валбон Лимани како градоначалник и Советот на општината ќе дискурираат на „вонредна седница“, за да преземаат мерки“
„Кризниот штаб е активиран и ќе има телефонски број, на кој граѓаните може да се обратат за помош и снабдување со вода за пиење. Ова се дел од мерките, што Општина Гостивар ќе ги спроведува од денес.“ – соопшти градоначалникот Валбон Лимани денес на прес-конференција во Гостивар. „На мој предлог веќе е активиран кризниот штаб од нашата Општина и набргу ќе заседава. Ќе дава и препораки, но и помош на сите граѓани што имаат потреба од тоа.“ – дополни тој.
Лимани информира дека за донесување одлуки и мерки ќе се расправа на „вонредната седница“ на Советот на општината, „за да им се помогне граѓаните што имаат потреба и кои се затекнати од оваа ситуација“. „Општината ќе објави официјален телефонски број, на кој граѓаните што не може да излезат да земат вода ќе се јават и со мобилни екипи ќе им се доставува до нивните домови.“ – рече градоначалникот. Вонредната седница општинскиот Совет ја закажа за 15 часот.
Гостиварскиот градоначалник напомна дека локалната самоуправа е во координација со сите релевантни институции и соработуваат, како што посочи, „за да се дознае вистината“. „По објавување на резултатите веднаш ќе почнеме со активности, за дезинфекција и прочистување на водоводната мрежа и засилени контроли, за да се обезбеди пристап до здрава вода што е можно побргу.“ – рече Лимани. На новинарско прашање за преземањето одговорност за настаната состојба, градоначалникот Лимани напомена дека „не чувствува морална одговорност“ и оти „како мерка ја суспендирал директорката на ЈП ‘Комуналец“, но и „дел од раководството одговорно за водоводот“.
„Во контакт сум со директорката на ЈП ‘Комуналец“ и со раководството. Тие моментно се суспендирани од функциите. Денес ги очекуваме резултатите и врз основа на тоа ќе постапиме. Не сакам никој однапред да ја преземе вината, но не сакам ниту како било да се попречи работата на надлежните органи. Јас не чувствувам морална одговорност, затоа што јавното претпријатие е правно лице кое менаџира. Ако беше поинаку, секако првата оставка ќе дојдеше од моја страна.“ – тврдеше Лимани.
Лимани искажа благодарност до сите компании поединци, кои деновиве се ангажираа за да се надмине недостигот на вода за пиење, но не ја спомена големата помош на Владата на Република Македонија. На локалните избори Лимани беше избран како градоначалник на Гостивар со гласовите на ДУИ, на Алијансата за Албанците на Арбен Таравари и на СДСМ на Венко Филипче