Во официјално писмо до претседателот на Европскиот парламент Роберта Мецола Советот на Македонските заедници на Австралија искажува разочарување од тоа што европскиот законодавен дом го тргна македонскиот идентитет и јазик од Извештајот за Македонија.
Македонските активисти од Австралија сметаат дека се работи за расистички и шовинистички однос кон Македонија и за подмолно влијание на Грција и Бугарија во Европарламентот.
,,Во име на бројната австралиско-македонска заедница, би сакале да го изразиме нашето длабоко разочарување и гнев од неодамнешната одлука на Европскиот парламент да го измени извештајот на Европскиот парламент (ЕП) за напредокот на Република Македонија во европската интеграција за да ги отстрани сите референци за „македонски идентитет“ и „македонски јазик“ од документот.
Оваа расистичка и шовинистичка одлука не може да се оправда на никаков логичен начин и јасно покажува како Бугарија и Грција биле претерано вклучени во неискрено и подмолно влијание во овој процес.
Кодексот на однесување на Европскиот парламент ги утврдува како свои водечки принципи дека членовите треба да дејствуваат исклучиво во јавен интерес и да ја извршуваат својата работа со незаинтересираност, интегритет, отвореност, трудољубивост, чесност, одговорност и почитување на достоинството и угледот на Европскиот парламент. Оваа неправедна и неетичка одлука отворено ги прекршува овие водечки принципи на бесрамен начин.
Ако постојните членки на Европската Унија не сакаат Македонија да биде примена како членка на Унијата без да се откаже од нејзиното име, идентитет, култура и историја, тогаш во реалноста, нема смисла Македонија да продолжи во овој срамен, понижувачки и измамнички процес.
Госпоѓо претседателе, ве повикуваме итно да ја преиспитате оваа одлука, бидејќи не може да се дозволи оваа расистичка и шовинистичка одлука да помине ако сакаме да се почитува и одржува интегритетот на Европскиот парламент.
Како заклучок, неправедните бариери и неприфатливите предуслови што ѝ се наметнати на Македонија никогаш не биле побарани од ниту една друга земја-членка. Доколку оваа неправедна ситуација продолжи, алтернативната опција на Македонија може да биде да побара членство во други асоцијации како што е БРИКС, каде што би биле безусловно топло добредојдени и третирани со почит”, пишува во писмото до претседателката на Европскиот Парламент Роберта Мецола потпишано од Крис Ангелков, Претседател на Советот на македонски заедници на Австралија.
Оваа организација нема реално влијание на политичките процеси во Македонија но дилемите што ги поставува се релевантни на многу луѓе кои живеат во земјата.