На средбата во Охрид, министрите за внатрешни работи на Македонија и Словенија, Панче Тошковски и Боштјан Поклукар, разговараа за продлабочување на соработката меѓу двете земји во клучни области како што се борбата против организираниот криминал, справувањето со илегалната миграција, зајакнувањето на внатрешната контрола и унапредувањето на обуките за полициските службеници. Македонската страна предложи потпишување на Меморандум за соработка меѓу Центарот за обука на МВР на Македонија и Полициската академија на Словенија, со цел интензивирање на заедничките образовни програми и обуки за полициските сили.
Министерот Тошковски изрази благодарност до својот колега Поклукар за континуираната поддршка од Словенија, особено во справувањето со пожарите во изминатите две години и помошта по трагедијата во Кочани.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција.“, истакна Тошковски.
Тој додаде дека Словенија, преку министерот Поклукар и неговиот тим, останува посветен партнер во поддршката за евроинтеграциите на Македонија, помагајќи во исполнувањето на критериумите поставени од Европската Унија.
Словенечкиот министер Поклукар ја нагласи цврстата врска и пријателството меѓу двете земји, кое се рефлектира и во соработката меѓу министерствата.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, рече Поклукар.
Тој потенцираше дека Словенија останува посветена на поддршката за Македонија во нејзиниот пат кон полноправно членство во ЕУ, уверувајќи дека местото на Македонија е во европското семејство.
Средбата во Охрид ја потврди заедничката заложба на двете земји за унапредување на безбедноста во регионот преку заеднички проекти, споделување искуства и поддршка во евроинтегративните процеси.