
Борислав Божинов, македонски активист од селото Крумово до аеродромот во Пловдив, на 13 мај имал уште еден неуспешен обид за регистрација на ОМО „Илинден“ во Бугарија, објави Ицо Најдовски-Перин, новинар и активист на македонската заедница во Австралија.
„Уште еден обид за регистрација на здружението ‘Обединета Македонска Организација – Илинден’ во Пловдив беше спречен. Македонскиот активист Борислав Божинов од Крумово повторно достави документи до Агенцијата за регистрација со барање за формирање организација за заштита на правата на Македонците во Бугарија.
Да потсетиме дека минатите години Борислав Божинов направи неколку обиди да ја регистрира ОМО ‘Илинден’, но секогаш наидуваше на институционален отпор. Во 2023 година судиите дури и посочија дека треба да се отфрли поради премисата за кршење на Уставот, бидејќи одредбите од Статутот сугерираат дискриминаторски третман на одредени етнички групи од страна на државата и создаваат предуслови за поделба на нацијата. Во оваа фаза, тој организирал македонски клуб кој ќе биде сместен во дворот на неговиот дом, но не е јасно дали некој е член на него, пишува во одлуката на Судот“, напиша Најдовски на Фејсбук.