„Скопје ќе има Национален фестивал на албанската култура ‘Порта на културата’ – настан, што ќе ги обедини музиката, театарот, филмот, литературата и визуелните уметности во единствена манифестација. Ова беше темата на разговор со мојот пријател, светски познатиот албански тенор Рам Лахај, додека пиевме кафе во нашата прекрасна чаршија.“ – објави вицепремиерот и кандидат за градоначалник на Општина Чаир, Изет Меџити по средбата со тенорот Лахај во Старата чаршија во главниот град.
Најавувајќи ја преку општествената мрежа иницијатива, Меџити истакна во изјава за медиумите дека се работи за „голем проект во сферата на културата, кој ќе ги врати Чаир и Скопје во центарот на културната мапа на Албанците“.
Според Меџити, главниот град ќе биде домаќин на Националниот фестивал на албанската култура „Порта на културата“ како „ единствен настан што ќе ја обедини музиката, театарот, филмот, литературата и ликовната уметност на една сцена“. Меџити му ја претстави идејата за овој фестивал на познатиот тенор, при што „биле споделени заеднички визии“.
Изет Меџити додава дека „Порта на културата“ „ќе прерасне во нова традиција, што ќе ги претставува албанските уметници и ќе ги поврзе генерациите преку уметноста и креативноста“.