Мите Стефовски, советник од редовите на советничката група на ВМРО-ДПМНЕ, денес беше избран како нов претседател на Советот на општина Струга. На вонредната седница на Советот тој беше избран со 14 гласови „за“ и со 9 гласови „против“.
Општинскиот комитет на ВМРО ДПМНЕ веднаш изреагира во објава на фејсбук по изборот на првиот човек на општинскиот Совет, порачувајќи: За среќа на стружани, мнозинството од избраните советници се одважија и пројавија политичка зрелост и единство, ставајќи ги општите интереси над партиските. После неколку неуспешни обиди да се избере претседател на Советот и да се оформат комисиите, денес и формално правно заврши основањето на Советот на Општина Струга. Ваквиот епилог никако не смее да се толкува како нечиј пораз или нечија победа, со него се отвора ново поглавје во практикувањето на власта, во која сивилото на етноцентризмот (како критериум) ќе биде заменето со стручност и професионалност. Мите Стефоски, советник од редовите на советничката група на ВМРО-ДПМНЕ, е избран како претседател на Советот. И нему и на сите советници им честитаме на изборот и им посакуваме успешна и плодна работа во мандатот кој им е доверен. Стружани очекуваат резултати преку капитални инвестиции, отворена администрација, јавни претпријатија, кои ќе ги намалат трошоците и ќе остваруваат квалитетни услуги, подобар квалитет на живот (без загадување и со дислоцирана депонија), повеќе пари за образованието, спортот и културата, подобри патишта и поорганизирана сообраќајна инфраструктура, ставање крај на урбаниот хаос и сѐ што значи достоинствено и квалитетно живеење. На последниот ден од годината, што изминува, ќе посакаме сѐ што било лошо да остане во минатото, а во Новата година здравје, успех и напредок.“