Ако „Ѓока Констракшн“ го добиеше договорот за јавно-приватно партнерство, паркингот ќе поскапеше речиси двојно, а од годишниот приход компанијата ќе ѝ исплаќаше на државата само еден отсто. Оваа фирма е поврзана со истраги во соседна Албанија во врска скандали за местење тендери. Таравари мораше под притисок да го поништи тендерот за скопскиот Клинички центар, по што албанските медиуми објавија дека „останал должен“ и барал решение за проблемот од политичари во Тирана.
Синоќа во емисијата „Дебата на ТВ Шења“, прашан дали може да се случи враќање на Алијанса за Албанците во Владата, Таравари изјави дека е „понижувачки да се влезе од каде што си заминал“, но „не ја исклучи можноста да влезе пак во владата ама само да се случи со нов договор“. Таравари„категорично нагласи“ дека „основниот предуслов се гаранции за уставни измени и почеток на преговорите со ЕУ“ и „енергично додаде“ дека „во спротивно нема што да се разговара“!
Прашан од новинарите за тоа кој бил најуспешен, а кој неуспешен министер во неговиот кабинет, но и дали има место за нови коалициски партнери, премиерот Мицкоски најави дека големиот „владин ремонт“ е веќе започнат. Тој потврди дека во моментов засилено се одвиваат преговорите за реконструкција на Владата и побара уште само малку трпение од јавноста, најавувајќи дека само за неколку дена сè ќе биде целосно познато и разјаснето.