Во пресрет на 80-годишнината од основањето на Македонскиот народен театар (МНТ), на 29 декември 2025 година на големата сцена премиерно ќе биде изведен сценскиот спектакл „Сонцето, колку е блиску сонцето – Made in МNT“, во режија на Дејан Пројковски.
Претставата е спој на минатото и сегашноста преку клучните вредности на МНТ – љубов, уметничка храброст, посветеност, визија, тимска работа, чување на традицијата и создавање нови вредности за иднината.
Спектаклот претставува аудиовизуелно патување низ македонската драматургија, поезија, проза, песна и ликовна уметност – емотивна приказна посветена на големите актери, режисери, драматурзи и сите професионалци зад кулисите кои го создаваат сценскиот универзум на МНТ.
Во претставата учествува огромна актерска екипа од ансамблот на МНТ, оперски пејачи, актери и студенти по актерска игра од Факултетот за драмски уметности и Еуропа Прима. За Кореографија е задолжена: Олга Панго (асистент: Ирена Лозинска),Асистент на режија: Андреј Цветановски,Сценографија: Валентин Светозарев, Костими: Марија Пупучевска,Музика: Горан Трајкоски,Дизајн на 3Д-видеомапинг: Сергеј Светозарев.
Публиката ќе биде дел од големо патување во „театарот на сонцето“, со акцент на 3Д-видеомапингот и спој на повеќе изразни средства.
Насловот „Сонцето, колку е блиску сонцето“ е првата реплика изговорена на македонски јазик на сцената на МНТ – од актерката Вера Вучкова на 3 април 1945 година во претставата „Платон Кречет“ од Александар Корнејчук, во режија на Димитар Ќостаров.
Во драмската структура се користени материјали од: Глигор Прличев, Војдан Чернодрински, Ташко Георгиевски, Ристо Крле, Дејан Дуковски, Горан Стефановски, Блаже Конески, Јордан Плевнеш, Петре М. Андреевски, Коста Рацин, Браќа Миладиновци, Никола Јонков Вапцаров, Коле Неделковски, Васил Иљоски, Гане Тодоровски, Марко Цепенков, Живко Чинго, Коле Чашуле и Крсте Петков Мисирков, како и текстови од Бранислав Нушиќ, Исак Бабељ, Н.В. Гогољ, Гордан Михиќ и Александар Корнејчук.
Во спектаклот играат (дел од ансамблот): Игор Џамбазов, Весна Петрушевска, Тони Михајловски, Владо Јовановски, Снежана Коневски-Руси, Александар Шехтански, Кирил Андоновски, Томе Витанов, Нино Леви, Искра Ветерова, Сенко Велинов, Дарја Ризова, Тања Кочовска, Никола Ристановски, Сашко Коцев, Звездана Ангеловска, Борче Начев, Благој Веселинов, Нина Деан, Ѓорѓи Јолевски, Габриела Петрушевска, Александар Ѓорѓиески, Наталија Теодосиева, Стефан Спасов, Александар Микиќ, Марија Новак, Оливер Митковски, Николина Кујача, Софиа Насевска-Трифуновска, Арна Шијак, Дамјан Цветановски, Григор Јовановски, Ненад Нацев, Јордан Симонов, Гораст Цветковски, Сашка Димитровска, Ивица Димитријевиќ, Висар Вишка, Ана Стојановска, Камка Тоциновски, Тина Трпкоска, Билјана Јовановска, Јана Вељановска, Леонида Гулевска, Бранко Михајловски, Илина Чонкова, Ванеса Тримчевска, Анастасија Митровска, Иво Јездиќ, Мирјана Трпковска, Ирена Димеска, Кристина Гиева, Ана Јовановска, Нела Павловска, Томе Станковски, Јована Миладинова, Стефанија Начевска, Стефани Димитрова, Енис Билаловиќ, Ѓорѓи Нешковиќ, Илин Јовановски, Тамара Ристоска, Тодор Стојковски; оперски солисти Ана Дурловски и Игор Дурловски, како и членови на Актерското студио Михајловски.
„Перформансот е големо патување низ националната драма и сите основоположници на македонската драма и литература. Во претставата ќе бидат претставени сценски слики од највпечатливите моменти на сите големи автори на големата драматика, како и сите оние слики што се втиснати во колективната меморија и традиција“ – вели режисерот Дејан Пројковски.