На Клиниката за инфективни болести, во моментов се хоспитализирани 19 пациенти со западно-нилска треска, од нив двајца се во тешка состојба, а тројца се екстубирани, информираше денеска директорот на Клиниката Фадил Цана.
- „Кај нас во одделот за интензивна нега се 5 пациенти, од кои сите беа со тешка клиничка слика. Тројца се екстубирани, кај нив е значително подобрена клиничката слика. Но, тоа е динамичен процес, очекуваме дека брзо ќе бидат опоравени, па засега остнуваат на респиратор двајца пациенти кои се доста во тешка здравствена состојба. Потешките пациенти се во напредната возраст и се пациенти кои имаат многу други придружни заболувања и сите се мажи, сите се над 60 годишна возраст“, информира Цана.
Министерот Сашо Клековски кажа дека има евидентирано вкупно 55 случаи на западно-нилска треска, од кои 53 се потврдени, а два не се.
- „Од нив еден е без хоспитализација, 52 беа хоспитализирани. Процентуално, смртноста досега е 11,5 отсто, просечното траење на лекувањето е 14 дена, најкраткиот испис е 8 дена. Врвот на оптовареност бил на 12 август кога имало 24 хоспитализирнани“, кажа Клековски.
Од Министерството за здравство посочуваат дека податоците за бројот на заболени и излекувани, како и мапирањето на случаите по општини, ризичните водни површини и спроведените третмани, се јавно достапни на платформата healthalert.mk.